跟了個旅行團去維也納，話哂音樂之都，夜晚扮有文化，拉了太座同一眾團友去聽一場在美泉宮嘅古典CONCERT。

不過，個男高音一出場已覺唔妥，聲線混濁，亦不響亮，個場ACOUSTIC已經唔係太好，令人聽得好唔舒服。女高音亦都去唔到佢要去嘅高音。

好快，就聽到有一點點鼻鼾聲。

上下半場原各有45分鐘，點知上半場30分鐘就搞掂，那位想瞓耐少少嘅人兄被迫起身，然後在場外留言冊上寫佐四個字﹕非常失望。

佢聽過幾多至瞓著我唔知，但我相信係好多人嘅心聲。

聽埋下半場，都係30分鐘，總結係5人室樂團技巧OK，但歌劇部分頗差，最好嘅竟然係芭蕾舞，但我係來聽音樂嘅。最大問題係選曲甚偏，我聽得少，可能不應如此說，但有這評語嘅係一位有20年經驗嘅鋼琴老師團友。

在場觀眾雖說係香港同內地團友佔一半，但亦有白種人觀眾，因此樂團以此水準暗寸大國“疙”起嘅機會唔高，但係大家都明，做旅遊少不免食祖宗老本，維也納唔可以咁樣做壞自己個名。不過，大家若有機會跟團，這個節目可以免了，因為都幾貴。